கல்யாணமாகி ஒரு மாசம் கூட ஆகலை... புது மணப்பெண் பரிதாப மரணம்!
![லட்சுமிபாய் ஜாதவ்](https://www.dinamaalai.com/static/c1e/client/93068/uploaded/1f2e5cc651a5bdc47e9a32e726d392b8.jpg)
திருமணமாகி கொஞ்சம் நாள் தான் ஆச்சு... இன்னும் முழுசா ஒரு மாசம் கூட முடியலை.. அதுக்குள்ள இந்த பொண்ணுக்கு இப்படியா நடக்கணும் என்று அரற்றுகிறார்கள் கிராம மக்கள். சாலையில் இருசக்கர வாகனத்தில் சென்று கொண்டிருந்த போது, பரிதாபமாக வயர் அறுந்து விழுந்ததில் உயிரை இழந்திருக்கிறார் லட்சுமிபாய். கர்நாடக மாநிலம், பாதாமி தாலுக்கா, பாகல்கோட் மாவட்டம், சின்சலாகட்டே பகுதியைச் சேர்ந்தவர் லட்சுமிபாய் (36). இவர் தும்கூர் மாவட்டம் குனிகல் தாலுகாவில் உள்ள இப்பாடி கிராமத்தில் உள்ள சுகாதார நிலையத்தில் செவிலியராக பணிபுரிந்து வந்தார். நேற்று முன் தினம் மாலை வேலை முடிந்து லட்சுமிபாய் நடந்து சென்று கொண்டிருந்தார்.
அப்போது அந்த ஊரில் உள்ள அரசு தொடக்கப்பள்ளி தலைமை ஆசிரியராக பணிபுரியும் லட்சுமணன் இருசக்கர வாகனத்தில் வந்துள்ளார். லட்சுமணன், லட்சுமிபாய் தங்கியிருந்த கிராமத்தை சேர்ந்தவர் என்பதால், அவரை வீட்டில் இறக்கி விடுவதாக கூறினார். இதனால் அவருடன் செவிலியர் லட்சுமிபாய் வாகனத்தில் ஏறி சென்றுள்ளார். அப்போது குனிகல் நோக்கி இவர்களது இருசக்கர வாகனம் சென்று கொண்டிருந்த போது, சாலையின் நடுவில் இருந்த கேபிள் ஒயர் அறுந்து இருசக்கர வாகனத்தில் சென்ற லட்சுமிபாய், லட்சுமணன் மீது விழுந்தது. இதில் அவர்கள் இருவரும் துடிதுடித்து அலறியடித்தப்படியே கத்தினர்.
அவர்களது அலறல் சத்தம் கேட்டு அக்கம் பக்கத்தினர் ஓடி வந்து இருவரையும் மீட்டு மருத்துவமனைக்கு கொண்டு சென்றனர். ஆனால் செவிலியர் லட்சுமிபாய் ஏற்கனவே இறந்து விட்டதாக மருத்துவர்கள் தெரிவித்தனர். பலத்த காயமடைந்த தலைமை ஆசிரியர் லட்சுமணனுக்கு தீவிர சிகிச்சை அளிக்கப்பட்டு வருகிறது.
லட்சுமி பாயின் உடல் பிரேத பரிசோதனைக்காக குனிகல் பொது மருத்துவமனைக்கு அனுப்பி வைக்கப்பட்டது. இந்த விபத்து குறித்து குனிகல் போலீசார் வழக்குப்பதிவு செய்து விசாரணை நடத்தி வருகின்றனர். சமீபத்தில் தான் லட்சுமிபாய் திருமணம் செய்து கொண்டார். இன்னும் ஒரு மாதம் கூட முழுமையாக நிறைவடையாத நிலையில் அவர் மின்சாரம் தாக்கி உயிரிழந்த செய்தியால் சின்சலகட்டே பகுதி மக்கள் சோகத்தில் ஆழ்ந்துள்ளனர்.
லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!
பங்குனி உத்திரத்தின் மகத்துவம் தெரிஞ்சுக்கோங்க..!