அமெரிக்க ஓபன் டென்னிஸ்... இந்தியாவின் போபண்ணா 2வது சுற்றுக்கு முன்னேற்றம்!

நியூயார்க் நகரில் நடைபெற்று வரும் அமெரிக்க ஓபன் டென்னிஸ் தொடரின் ஆடவர் ஒற்றையர் பிரிவில் 3ம் நிலை வீரரான ஸ்பெயினின் கார்லோஸ் அல்கராஸ் அதிர்ச்சி தோல்வி அடைந்தார். அதே சமயம் இரட்டையர் பிரிவில் இந்தியாவின் ரோகன் போபண்ணா - எப்டன் ஜோடி 2வது சுற்றுக்கு முன்னேற்றம் அடைந்துள்ளனர்.அமெரிக்க ஓபன் டென்னிஸ் தொடரில் ஆடவர் ஒற்றையர் பிரிவின் 2வது சுற்றில் விளையாடிய ஸ்பெயினின் கார்லோஸ் அல்கராஸ், நெதர்லாந்தின் போடிக் வான் டி சான்ட்ஸ்கல்புடன் மோதினார். 2 மணிநேரம் 19 நிமிடங்கள் நடைபெற்ற இந்த போட்டியில் அல்கராஸ் 1-6, 5-7, 4-6 என்ற நேர் செட் கணக்கில் அதிர்ச்சி தோல்வி அடைந்தார்.

மகளிர் ஒற்றையர் பிரிவு 2வது சுற்றில் முதல் நிலை வீராங்கனையான போலந்தின் இகா ஸ்வியாடெக் 6-0, 6-1 என்ற செட் கணக்கில் ஜப்பானின் ஷிபஹாராவை வீழ்த்தி 3-வது சுற்றுக்கு முன்னேறினார். 6-ம் நிலை வீராங்கனையான அமெரிக்காவின் ஜெசிகா பெகுலா 7-6 (7-4), 6-3 என்ற செட் கணக்கில் சகநாட்டைச் சேர்ந்த சோபியா கெனினையும், 22-ம் நிலை வீராங்கனையான பிரேசிலின் பீட்ரிஸ் ஹடாட் மையா 6-2, 6-1 என்ற செட் கணக்கில் ஸ்பெயினின் சாரா சோரிபெஸ் டோர்மோவையும் வீழ்த்தி 3-வது சுற்றில் நுழைந்தனர். 

ஜப்பானின் நவோமி ஒசாகா 3-6, 6-7 (5-7) என்ற கணக்கில் செக் குடியரசின் கரோலினா முச்சோவாவிடம் வீழ்ந்தார்.அமெரிக்க ஓபன் டென்னிஸ் தொடரில் ஆடவருக்கான இரட்டையர் பிரிவு முதல் சுற்றில் இந்தியாவின் ரோகன் போபண்ணா, ஆஸ்திரேலியாவின் மேத்யூ எப்டன் ஜோடி, நெதர்லாந்தின் சாண்டர் அரெண்ட்ஸ், ராபின் ஹாஸ் ஜோடியை எதிர்த்து விளையாடியது. இதில் போபண்ணா - எப்டன் ஜோடி 6-3, 7-5 என்ற செட் கணக்கில் வெற்றி பெற்று 2-வது சுற்றுக்கு முன்னேறியது.