பகீர் வீடியோ.. விபத்தில் உயிரிழந்தவரின் உடலை ஆற்றில் வீசிய போலீசார்.. வெடித்த சர்ச்சை..!
பீகார் மாநிலம் முசாபர்பூர் அருகே உள்ள பகுலி தேசிய நெடுஞ்சாலையில், டிரக் ஒன்று மோதிய விபத்தில் சம்பவ இடத்திலேயே ஒருவர் உயிரிழந்தார். அந்த நபரின் சடலம் அப்படியே சாலையில் கிடந்ததையடுத்து, அவ்வழியாகச் சென்றவர்கள் காவல்துறையினருக்கு தகவல் அளித்துள்ளனர். இதனையடுத்து சம்பவ இடத்திற்கு வந்த காவல்துறையினர் சடலத்தை அங்கிருந்து அப்புறப்படுத்த முற்பட்டனர். ஆனால், அந்தச் சடலத்தை முறைப்படி மருத்துவமனைக்கு எடுத்துச் சென்று பிரேதப் பரிசோதனை செய்யாமல், அருகில் இருந்த ஆற்றுக்குள் போலீசார் வீசியுள்ளனர்.
இதனையடுத்து இந்த சம்பவம் குறித்து மாவட்ட காவல் கண்காணிப்பாளர் ராகேஷ் குமார் கூறுகையில், ’இந்த சம்பவம் மிகவும் அதிர்ச்சியளிக்கிறது. இதுதொடர்பாக ஓட்டுநர் கான்ஸ்டபிளை இடைநீக்கம் செய்துள்ளோம். மேலும், பணியில் இருந்த இரண்டு ஊர்க்காவல் படை வீரர்களின் ஒப்பந்தத்தையும் நிறுத்திவைத்துள்ளோம். தொடர்ந்து விசாரணை நடைபெற்று வருகிறது" எனத் தெரிவித்துள்ளார்.