உதவ போய் வந்த வினை.. கைதான தமிழக மீனவர்கள்.. இலங்கை கடற்படையினர் பெரும் அட்டூழியம்!

தமிழக மீனவர்களை எல்லை தாண்டி வந்து மீன் பிடித்ததாக இலங்கை கடற்படையினர் கைது செய்து வருகின்றனர். தமிழக மீனவர்கள் பிரச்னைக்கு மத்திய, மாநில அரசுகள் இணைந்து தீர்வு காண வேண்டும் என தமிழக அரசியல் கட்சிகள் வலியுறுத்தி வருகின்றன. எனினும் இலங்கை கடற்படையின் அட்டூழியங்கள் இன்றும் குறையவில்லை. இந்நிலையில், மயிலாடுதுறை மாவட்டம் பூம்புகாரைச் சேர்ந்த 37 மீனவர்களை இலங்கை கடற்படையினர் கைது செய்துள்ளனர். இந்த சம்பவம் தமிழக மீனவர்கள் மத்தியில் பெரும் கொந்தளிப்பை ஏற்படுத்தியுள்ளது.

மயிலாடுதுறை மாவட்டம் சீர்காழியை அடுத்த பூம்புகார் மீனவர் கிராமத்தை சேர்ந்த செல்லத்துரை என்பவருக்கு சொந்தமான விசைப்படகு மற்றும் நான்கு பைபர் படகுகளில் கடந்த 20ம் தேதி இரவு 43 மீனவர்கள் கடலுக்கு சென்றனர். நேற்று காலை பூம்புகார் துறைமுகத்தில் இருந்து புறப்பட்டு கரை திரும்புவதாக இருந்தது. ஆனால் மாலை வரை மீனவர்கள் யாரும் கரை திரும்பவில்லை. மேலும் மீனவர்களிடம் இருந்து எந்த தகவலும் வராததால் மீனவ கிராமங்களில் அச்சம் ஏற்பட்டது.

இந்நிலையில், நேற்று, இலங்கை தீவு அருகே மீன்பிடித்த போது, ​​எல்லை தாண்டியதாக கூறி, மீனவர்களை, இலங்கை கடற்படையினர் கைது செய்து, இலங்கைக்கு அழைத்துச் சென்றது தெரியவந்தது. தகவலின் பேரில் மீன்வளத்துறை கண்காணிப்பாளர்கள் தீனதயாளன், வாசன் ஆகியோர் பூம்புகார் துறைமுகத்தில் நடந்த சம்பவம் குறித்து விசாரணை நடத்தினர். 1 விசைப்படகு, 2 பைபர் படகுகளில் இருந்த மயிலாடுதுறை மாவட்டம் பூம்புகார் மீனவ கிராமத்தை சேர்ந்த 21 மீனவர்கள், சின்னமேடு கிராமத்தை சேர்ந்த 3 மீனவர்கள், சந்திரபாடி கிராமத்தை சேர்ந்த 13 பேர் உள்பட 37 மீனவர்களை இலங்கை கடற்படை கைது செய்தது தெரியவந்தது. அதன்பிறகு, இலங்கை கடற்படையினரால் மீனவர்கள் கைது செய்யப்பட்டிருப்பது மயிலாடுதுறை மாவட்ட மீனவ கிராமங்களில் பதற்றத்தை ஏற்படுத்தியுள்ளது.

இந்நிலையில், எஞ்சிய இரண்டு பைபர் படகுகளில் 6 மீனவர்கள் இலங்கை கடற்படையினரிடம் இருந்து தப்பித்து இன்று காலை பூம்புகார் துறைமுகத்திற்கு வந்தனர். தப்பி ஓடிய மீனவர்கள் கூறியதாவது; நாங்கள் இந்திய கடல் பகுதியில் மீன் பிடித்துக் கொண்டிருந்தோம். அப்போது அங்கு இலங்கை மீனவர் ஒருவரின் உடல் மிதந்தது. இது குறித்து வாக்கி டாக்கியில் தெரிவித்தோம். அப்போது இலங்கை மீனவர்கள் எங்களை தொடர்பு கொண்டு அது தங்கள் மீனவரின் உடல் என்றும், இன்னும் சிறிது நேரத்தில் அங்கு வருவோம் என்றும் அதுவரை உடலை பார்த்துக்கொள்வோம் என்றும் தெரிவித்தனர்.

அதன்படி சிறிது நேரத்தில் அங்கு வந்த இலங்கை மீனவர்கள் இறந்த சக மீனவரின் உடலை மீட்டனர். அப்போது, ​​அந்த வழியாக வந்த இலங்கை கடற்படை பூம்புகார், எல்லை தாண்டியதாக கூறி 1 விசைப்படகு, 2 பைபர் படகுகளுடன் சக மீனவர்களை கைது செய்தனர். இதை பார்த்த மீனவர்கள் படகை வேகமாக திருப்பியதில் இரண்டு படகுகளில் இருந்த 6 பேர் தப்பியோடினர்.

இந்நிலையில், இலங்கை கடற்படையினரால் கைது செய்யப்பட்ட மீனவர்களின் உறவினர்கள் மற்றும் படகை பத்திரமாக மீட்டுத் தருமாறு மத்திய மாநில அரசுகளுக்கு கண்ணீர் மல்க கோரிக்கை விடுத்துள்ளனர். மேலும், சிறைபிடிக்கப்பட்ட மீனவர்களும், பூம்புகார் மீனவர்களும் படகை திருப்பிக் கொடுக்கும் வரை காலவரையற்ற வேலைநிறுத்தப் போராட்டத்தில் ஈடுபடப் போவதாக கூறி போராட்டத்தை தொடங்கியுள்ளனர். இதன் காரணமாக 500க்கும் மேற்பட்ட பைபர் படகுகளுடன் 75 விசைப்படகுகள் துறைமுகத்தில் நிறுத்தப்பட்டுள்ளன.

புரட்டாசி மாதத்தில் இத்தனை சிறப்புகளா? என்னென்ன வழிபாடுகள், பலன்கள் தெரியுமா?

செல்வம் நிலைத்திருக்க புரட்டாசி சனிக்கிழமை வழிபாடு, பலன்கள்!

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!

புரட்டாசி மாதத்தில் ஏன் அசைவம் சாப்பிடக்கூடாது ... விஞ்ஞான விளக்கம்!